کھوج میں ہوں

امارتیں بانٹتے ۔۔۔۔۔۔۔۔۔۔ فقیروں کے کھوج میں ھوں
میں حیرتوں کے نئے جزیروں کے کھوج میں ھوں
۔
محبتوں کی نیاز ھو جن کے در کی پہچاں
بتوں کی بستی میں ایسے پِیروں کے کھوج میں ھوں
۔
سالک صدیقی
11-06 ۔۔۔۔ 25-11-2016

30-12-2011

کاش

وہ مجھ میں اُتر کر دیکھتا

صرف سطحِ آب سے

جو چاھتا تھا ماپنا، سالک

مری گہرائیاں

وہ آبلہ پا

محبتوں کے چراغ لے کر
وہ آبلہ پا
جو ایک مدت سے
ہم سفر کی تلاش میں تھا
وہ حیرتوں کی دبیز دھند
اور بے نشاں راستوں کا

بھٹکا ہوا مسافر
نہ جانے چپ چاپ، تنہا
کن منزلوں کی جانب نکل گیا ہے

سالک صدیقی

اک شبیہہ

مرے گماں کے کینوس پہ
آج کل
ابھر رہی ہے
اک شبیہہ
جسے
مرے یقیں کا فریم چاھیئے

سالک صدیقی

پیاسی آنکھیں

نیند کی پیاسی آنکھیں بھی
اب مری طرح
خوابوں کا بوجھ سنبھالے
آدھی رات گذرتے ہی
بوجھل ہونے لگتی ہیں
نئی سحر کے دامن کو
تشنہ امیدوں کے ساون میں
چپکے سے دھونے لگتی ہیں

خود کلامی

1. جانے کیا بات ہے
   آتی ہے لبوں تک
   تو ٹھہر جاتی ہے
   جانے کیا لفظ ہیں
   اظہار کے محتاج ابھی
   جانے اس دل کی کوئی دھڑکن بھی
   

   منتظر ہے کہ کوئی اس کو
   محبت کی سماعت سے سنے
   جانے آنکھوں سے کوئی اشک
   ٹپکنے سے گریزاں ہے کہ وہ
   اپنی حرمت کے تقدس کو کسے ھدیہ کرے
   جانے کیا خواب سنبھالے ہوئے, آنکھیں میری
   رات بھر سونے سے گھبراتی ہیں
   جانے کیا بات ہے
   اک پل کو سکوں ہے نہ قرار
   اب تو رکھتا بھی نہیں وقت کے مصرف کا شمار
   زندگی یونہی اچانک جیسے
   بے یقینی کے کسی موڑ پہ آ ٹھہری ہے
   جانے کیا خواہش بے نام مرے ہاتھوں میں
   پھر کسی کُن کے لئے مثل دعا ٹھہری ہے
   جانے اس کُن کے مقدر میں کبھی
   فیَکُن ہونا لکھا ہے کہ نہیں!
   
   سالک صدیقی
   20:38 . . . . . 29-10-2012

گستاخی

منزلیں بتاتے ہو
سمت بھی دکھاتے ہو
ساتھ تو چلو کبھی
رہبری کے دعوے سے
رستے، گہرے زخموں تک
اک سفر کرو کبھی

منزلوں سے واقف ہو
راستوں سے نا واقف!

سالک صدیقی